बंगाल के खाड़ी ले आथे नमी, कोई-कोई जगह बादर गरजही अऊ हल्का बारिस के आसार

Chhattisgarh Weather : रायपुर। छत्तीसगढ़ म तापमान ह कुछ डिग्री गिरे हे, तभो ले लोगन मन गर्मी ले हलाकान हें। बंगाल के खाड़ी ले कम स्तर म नमी आवत हे जेखर असर ले कतको जगह हल्का बारिस घलो होइस। अब चिपचिपी गर्मी ह लोगन मन ल परेशान करत हे। मौसम विभाग के कहना हे कि नमी के सेती अभी गरज-चमक के साथ छींटा परत रही अऊ अंधड़ चले के घलो संभावना हे।

बीते 24 घंटा म प्रदेश के एक-दू जगह म हल्का ले मध्यम बारिस होइस। सबले जादा तापमान दुर्ग म 43.5 डिग्री अऊ सबले कम अंबिकापुर म 23.5 डिग्री दर्ज करे गिस। आने वाला तीन दिन म तापमान म 2 ले 3 डिग्री के अऊ गिरावट हो सकथे।

मौसम विज्ञानी मन के मुताबिक, हवा म चकरी घेरा बने के सेती अऊ बंगाल के खाड़ी ले नमी आए के कारन प्रदेश के एक-दू ठन जगह म गरजन-चमकन के साथ हल्का बारिस हो सकथे। कतको जगह म बिजली गिरे अऊ अंधड़ चले के घलो डर हे।

रायपुर म आज बिहनिया ले मौसम साफ रही, पर मंझनिया के बाद बादर छाए के संभावना हे। रायपुर के अधिकतम तापमान 43 डिग्री अऊ न्यूनतम 27 डिग्री के आसपास रह सकथे।