छत्तीसगढ़ के वरिष्ठ पूर्व आईएएस अधिकारी बीकेएस रे के निधन, प्रशासनिक जगत में शोक के लहर

bks ray ias death : रायपुर। छत्तीसगढ़ के प्रशासनिक दुनिया के वरिष्ठ अउ सम्मानित चेहरा म शामिल रिटायर्ड आईएएस अधिकारी बीकेएस रे (BKS RAY) के निधन हो गे हे। ओमन लंबा समय से बीमार चलत रहिन, जेकर इलाज रायपुर एम्स (AIIMS) म चलत रीहिस। इलाज के दौरान ओमन आखिरी सांस लीन। बीकेएस रे के निधन के खबर से प्रशासनिक, शैक्षणिक अउ सामाजिक क्षेत्र म शोक के लहर दौड़ गे हे।

बी.के.एस. रे छत्तीसगढ़ के उन चुनिंदा वरिष्ठ नौकरशाह म शामिल रहिन, जेमन राज्य गठन के शुरुआती बछर म प्रशासनिक ढांचा ला मजबूत बनाय म बड़ भूमिका निभाइन। ओमन भारतीय प्रशासनिक सेवा (IAS) के 1972 बैच के अधिकारी रहिन अउ अपन लंबा प्रशासनिक अनुभव, साफ सोच अउ सुशासन बर जाने जात रहिन।

अपन प्रशासनिक जीवन म ओमन गृह, परिवहन अउ विमानन जइसन बड़-बड़ अउ महत्वपूर्ण विभाग म जिम्मेदारी सम्हालिन। बाद म ओमन प्रशासन अकादमी के महानिदेशक (DG) के साथ-साथ माध्यमिक शिक्षा मंडल (माशिमं) अउ व्यावसायिक परीक्षा मंडल (व्यापम) के अध्यक्ष घलो रहिन। शासन अउ प्रशासन से जुड़े कई बड़ फैसला अउ नीतिगत काम म ओकर मनके बड़ भूमिका रीहिस।

बी.के.एस. रे ला एक पढ़इया-लिखइया अउ विद्वान अधिकारी के रूप म जाने जात रीहिस। रिटायरमेंट के बाद घलो ओमन सार्वजनिक जीवन म सक्रिय रहिन। प्रशासन, शिक्षा, सुशासन अउ पब्लिक पॉलिसी जइसन बिसय म ओकर लेख अउ व्याख्यान हमेसा चर्चा म रहत रीहिस। ओमन कई ठन किताब घलो लिखे रहिन। ओकर निधन म पूर्व अउ वर्तमान आईएएस अधिकारी, नेता अउ शिक्षाविद मन गहरा दुख जताय हें।