नवा नियम: घर बइठे मोबाइल ले कराव गैस के e-KYC, नई त रुक जाही आप मन के सब्सिडी

Aadhaar e-KYC Rule : अगर आप मन घलो रसोई गैस (LPG) के इस्तेमाल करत हो अउ सरकार कोति ले मिलइया सब्सिडी के लाभ लेवत हो, त ए खबर आप बर बहुते जरूरी हे। पेट्रोलियम अउ प्राकृतिक गैस मंत्रालय ह सबो गैस कनेक्शन धारक मन बर बायोमेट्रिक आधार ऑथेंटिकेशन (e-KYC) कराना अनिवार्य कर दे हे। यदि आप मन ए काम ला नई करव, त आप मन के सब्सिडी रुक सकथे अउ सिलेंडर भरवाए म घलो दिक्कत आ सकथे।

सबले बड़े राहत के बात ए हे कि अब e-KYC बर आप मन ला गैस एजेंसी के चक्कर काटे के अउ लंबा लाइन म खड़ा होय के जरूरत नई हे। अब आप मन अपन स्मार्टफोन ले घर बइठे ए काम ला निपटा सकत हो। बस आप ला अपन गैस कंपनी (Indane, Bharat Gas या HP Gas) के मोबाइल ऐप अउ सरकारी ‘Aadhaar FaceRD’ ऐप डाउनलोड करना प़ड़ही। फेस स्कैनिंग के जरिए आप मन के पहचान तुरंते वेरिफाई हो जाही।

उज्ज्वला योजना के हितग्राही मन बर कड़ा नियम
प्रधानमंत्री उज्ज्वला योजना के फायदा लेवइया मनखे मन बर नियम थोड़ा कड़ा हे। ओमन ला हर नवा साल के पहिली सिलेंडर भरवाए ले पहिली बायोमेट्रिक e-KYC कराना जरूरी हे। अगर अइसन नई करीन, त सब्सिडी रोके जा सकथे। साल म एक बार e-KYC कराए के बाद ओही साल म दोबारा एखर जरूरत नई पड़ही।

घर बइठे कइसे करव e-KYC?
ए प्रक्रिया बहुते सरल हे अउ कुछ मिनट म पूरा हो जाथे:

सबले पहिली अपन गैस कंपनी के ऐप अउ Aadhaar FaceRD ऐप इंस्टॉल करव।

ऐप म दिए गे निर्देश मन के पालन करव अउ कैमरा ले अपन चेहरा ला स्कैन करव।

प्रोसेस पूरा होतेच आप मन के अकाउंट e-KYC ले प्रमाणित हो जाही।

दिक्कत आए म कहां जाव?
अगर आप मन ला मोबाइल ऐप चलाए म कोनो परेशानी आवत हे, त घबराए के जरूरत नई हे। आप मन सोझे अपन गैस वितरक (Distributor) करा जाके मदद ले सकत हो। एखर अलावा, सरकार ह एक हेल्पलाइन नंबर 1800 2333 555 घलो जारी करे हे, जहां आप मन अपन समस्या बता सकत हो।