पूर्व मुख्यमंत्री भूपेश बघेल बर अभद्र टिप्पणी करइया आरोपी गिरफ्तार, जेल भेजीस

रायपुर। राजधानी रायपुर के सिविल लाइन थाना इलाका मा पूर्व मुख्यमंत्री भूपेश बघेल के खिलाफ सोशल मीडिया मा गंदी गाली-गलौज अउ अभद्र टिप्पणी करइया एक झन आरोपी ला पुलिस ह धर दबोचे हे। मारुति विहार कॉलोनी के रहइया शांतनु झा ह 27 जनवरी के ए मामला के लिखित शिकायत दर्ज कराए रहिस। शिकायत मा बताए गिस कि 25 जनवरी के अमित सोनी (अमित सेन) नाम के व्यक्ति ह सोशल मीडिया प्लेटफॉर्म ‘X’ मा पूर्व मुख्यमंत्री बर अश्लील अउ भड़काऊ बात लिखे रहिस, जेखर से सामाजिक माहौल बिगड़े के डर रहिस।

पुलिस ह ए शिकायत मा धारा 196, 352, 353 (2), अउ 356 BNS के तहत अपराध दर्ज करके जांच शुरू करिस। आरोपी अमित सेन (31 साल), जो कि भिलाई के आरोग्य हॉस्पिटल मा ड्रेसर के काम करथे, ओला 28 जनवरी के हिरासत मा लेगे गिस। पूछताछ मा आरोपी ह कबूलिस कि शराब के नशा मा ओ ह पूर्व मुख्यमंत्री बर अभद्र टिप्पणी कर दे रहिस। पुलिस ह आरोपी के मोबाइल जब्त कर ले हे अउ ओला गिरफ्तार करके 29 जनवरी के कोर्ट मा पेश करिस, जिहां ले ओला न्यायिक रिमांड मा जेल भेज दे गे हे।