हिंद महासागर मा कोहराम: भारत ले लहुटत ईरानी जहाज ऊपर हमला, श्रीलंका के तीर मा डूबीस, 87 सैनिक मन के मौत

IRIS Dena Sunk : कोलंबो/गाले। हिंद महासागर के शांत पानी मा ओ बखत हड़कंप मच गे जब श्रीलंका के समुंदर तीर मा एक ईरानी जुद्ध के जहाज (युद्धपोत) भीषण हमला के सिकार होके समा गे। अमेरिका अउ ईरान के बीच चलत जुद्ध के आज पांचवां दिन हे, अउ खबर आवत हे कि अमेरिका ह भारत ले लहुटत ईरानी युद्धपोत ‘IRIS देना’ ल श्रीलंका के तीर मा हमला करके डुबा दे हे। ए भयंकर हमला मा अभी तक 87 ईरानी नौसैनिक मन के मरे के पुस्टि होय हे, अउ 100 ले जादा झन अभी घलो गायब हें।

विशाखापट्टनम ले लहुटत रहिस जहाज
बताय जात हे कि ईरानी युद्धपोत ‘IRIS देना’ ह पिछिला महीना भारत के विशाखापट्टनम मा होय ‘2026 इंटरनेशनल फ्लीट रिव्यू’ मा सामिल होय बर आय रहिस। अपन सरकारी जात्रा पूरा करके जब ये जहाज ह वापस ईरान लहुटत रहिस, तभे श्रीलंका के दक्खिन कोती ले लगभग 75 किलोमीटर दूरिहा गाले सहर के तीर एखर ऊपर हमला होगे। जहाज मा कुल 180 नौसैनिक सवार रहिन।

अमेरिकी पनडुब्बी ह दागिस टॉरपीडो
अमेरिकी रक्षा मंत्री पीट हेगसेथ ह ए हमला के जानकारी देवत बताइस कि हिंद महासागर मा तैनात एक अमेरिकी पनडुब्बी ह ईरानी जहाज ल निशाना बनाइस अउ टॉरपीडो ले हमला करके ओला डुबा दीस। हमला के बाद जहाज मा तेजी ले पानी भर गे अउ ओ ह समुंदर के भीतर समा गे। श्रीलंका नौसेना के कमांडर बुद्धिका संपत के मुताबिक, जब बचाव दल ओ जगा पहुँचे त जहाज नइ दिखत रहिस, सिरिफ़ समुंदर के ऊपर तेल के धब्बा अउ कुछु मनखे मन तैरत दिखिन।

रेस्क्यू ऑपरेशन अउ बचाव के काम
बुधवार के बिहनिया करीब 6 ले 7 बजे के बीच जब जहाज ले मदद बर ‘डिस्ट्रैस कॉल’ (आपातकालीन संदेस) मिलिस, त श्रीलंका के नौसेना ह तुरते मोर्चा सम्हाल लीस। अभी तक के स्थिति अइसने हे:

कुल सवार: 180 नौसैनिक

मरे के संख्या: 87 लास बरामद होय हे।

बचाय गय मनखे: 32 घायल नौसैनिक मन ल अस्पताल मा भरती करे गे हे।

गायब: 60 ले जादा झन के खोज जारी हे।

श्रीलंका के रक्षा मंत्रालय के प्रवक्ता ह बताइस कि समुंदर मा बड़े पैमाना मा खोज अभियान चलत हे, पर समय बीतत जावत हे त गायब मनखे मन के बचे के उमीद कम होवत जावत हे। ए घटना ले पूरा दुनिया मा तनाव बढ़ गे हे अउ ईरान कोती ले घलो जवाबी कारवाही के डर बने हुए हे।