भारतीय सोलर कंपनी मन ला तगड़ा झटका: ट्रंप सरकार ह लगाइस 126% के भारी टैक्स, अब अमेरिका में सामान बेचना होही मुसकिल

Trump Tariffs India : वाशिंगटन/नई दिल्ली। अमेरिका के ट्रंप सरकार ह भारतीय सोलर इंडस्ट्री के कमर तोड़े बर एक बड़े फैसला ले हे। अमेरिकी कॉमर्स डिपार्टमेंट ह भारत ले आवे वाला सोलर सेल अउ पैनल ऊपर 125.87% के भारी काउंटरवेलिंग ड्यूटी (CVD) लगाय के एलान करे हे। भारत के संगे-संग इंडोनेशिया अउ लाओस ऊपर घलो ये टैक्स थोपे गे हे। अमेरिका के कहना हे कि ये देस मन के कंपनी मन ला ओखर सरकार ले भारी सब्सिडी मिलथे, जेखर सेती अमेरिका के देसी कंपनी मन ला नुकसान होवत हे।

काबर मिलीस एतका बड़े झटका? अमेरिका के सोलर कंपनी मन ह पिछले साल एक अर्जी लगाय रहीन कि विदेशी सामान मन के आवक ले ओखर व्यापार ठप होवत हे। जाँच के बाद अमेरिकी सरकार ह मुंद्रा सोलर जइसन भारतीय कंपनी मन ऊपर 125.87% ड्यूटी लगा दीस। एखर मतलब ये हे कि अब अमेरिका में भारतीय सोलर सामान के कीमत दोगुना ले घलो जादा बढ़ जाही, जेखर सेती ओला कोनो नई खरीदिहीं। 2025 में अमेरिका ह ये देस मन ले लगभग $4.5 बिलियन के सोलर सामान मँगाए रहीस, जेमा अब भारी गिरावट आ सकत हे।

आगू अउ बढ़ सकत हे मुश्किल ये तो अभी पहिली फैसला आय, अगले महीना अमेरिका ये घलो जाँच करही कि का भारत ह अपन सामान ला लागत ले घलो कम कीमत में (डंपिंग) अमेरिका में बेचत हे? अगर डंपिंग के आरोप सही पाय जाही, तो ये टैक्स ला अउ घलो बढ़ाए जा सकत हे। एखर ले छत्तीसगढ़ अउ भारत के दूसर राज्य मन के सोलर एक्सपोर्टर मन ला करोड़ों के घाटा होय के डर हे। अमेरिका के ए कदम ले पूरी दुनिया के सोलर सप्लाई चेन गड़बड़ा गे हे।